श्रीरामपूर येथील एक तरुण मागील काही दिवसांपासून बेपत्ता आहे. एका मुलीशी लग्न केल्याने त्याचं अपहरण केल्याचा आरोप करण्यात येत आहे. पोलिसही त्याचा शोध घेत असून, अद्यापही तो सापडला नाही आहे. त्याच पार्श्वभूमीवर भाजपा आमदार नितेश राणे यांनी श्रीरामपूर पोलीस आयुक्त कार्यालयावर जनआक्रोश मोर्चाचं आयोजन केलं होते. त्यावेळी बोलताना नितेश राणेंनी उपमुख्यमंत्री देवेंद्र फडणवीस यांचा हिंदुहृदयसम्राट, असा उल्लेख केला आहे. त्यामुळे सर्वांच्या भुवया उंचावल्या आहेत.
नितेश राणे बोलताना म्हणाले की, “महाराष्ट्राचे अल्पसंख्याक मंत्री नवाब मलिक नाही आहेत. नगर जिल्ह्याचे पालकमंत्री हसन मुश्रीफ नाहीत. महाराष्ट्राचे मुख्यमंत्री उद्धव ठाकरे नाहीये, हे संबंधितांनी लक्षात ठेवावं. महाराष्ट्रात हिंदुत्ववादी सरकार आहे. मुख्यमंत्री एकनाथ शिंदे कडवट हिंदू आहेत. तर, उपमुख्यमंत्री म्हणून हिंदुहृदयसम्राट देवेंद्र फडणवीस काम करत आहेत. हे अधिकाऱ्यांनी लक्षात ठेवावं,” असा इशारा पोलीस अधिकाऱ्यांना नितेश राणेंनी दिला आहे.“मी श्रीरामपूरला येतोय कळल्यावर तो पोलीस निरीक्षक सुट्टीवर गेला आहे. एक दिवस सुट्टीवर गेला आहे, वर्षाचे ३६५ दिवस नितेश राणेशी बोलावं लागेल ना. मग कुठे जाणार. आम्ही सर्वच पोलीस अधिकाऱ्यावर बोट उचलत नाही आहे. हिंदू धर्माला ताकद देणारे असंख्य अधिकारी आहेत. तीन चार दिवस झाले त्या मुलाची अवस्था कळत नाही. आरोपींना अटक झाली आहे, पण मुलाचा पत्ता नाही आहे. जोपर्यंत मुलगा सापडत नाही, तोपर्यंत आम्ही शांत बसणार नाही आहे. महाराष्ट्रात हिंदूत्ववादी सरकार आहे, हे प्रत्येक पोलीस अधिकाऱ्यांने लक्षात ठेवावं. कोणताही अधिकारी हिंदू मुलावर वाकड्या नजरेने बघेल त्याचे डोळे, जाग्यावर राहणार नाही,” असा दमही नितेश राणेंनी भरला आहे.
