![](https://rrcdigital.com/site/wp-content/uploads/2022/09/image-99.png)
शिरूर, पुणे : शिक्रापूर पोलीस स्टेशनच्या हद्दीत एका नेत्याच्या शेती आणि फार्म हाऊसवर कामाला असणाऱ्या शेतमजुरच्या अल्पवयीन मुलीवर तिच्याच नात्यातील तरुणाने जिवे मारण्याची धमकी देत बलात्कार केल्याची धक्कादायक घटना समोर आली आहे. या घटनेने राजकीय वातावरण तापण्यास सुरुवात झाली आहे.पोलिसांनी या घटनेप्रकरणी माहिती दिली आहे. पुण्यातील शिक्रापूर पोलीस स्टेशनच्या हद्दीत पुण्यातील एका भाजप नेत्याच्या शेती आणि फार्महाऊसवर विशाल गायकवाड आणि पीडित मुलगी यांचे आईवडील वास्तव्य आणि कामासाठी आहे. पीडित अल्पवयीन मुलगी आणि आरोपी हे दोघेही एकमेकांचे नातेवाईक आहेत. पीडित मुलीचे आईवडील कामानिमित्ताने बाहेर गेले होते. यावेळी त्यांच्या नात्यातील नराधमाने या फार्महाऊसच्या मागे असलेल्या मजूर खोल्यांच्या मागे या अल्पवयीन मुलीला घेऊन गेले. जिवे मारण्याची धमकी देत तिच्यावर बलात्कार केल्याचा आरोप आहे. ही घटना कळल्यानंतर पीडित मुलीच्या वडिलांनी शिक्रापूर पोलिसांना याबाबत माहिती दिली. त्यानंतर शिक्रापूर पोलीसांनी नराधम आरोपीला अटक करण्यात आली आहे, अशी माहिती शिक्रापूर पोलीस स्टेशनचे पोलीस निरीक्षक हेमंत शेडगे यांनी दिली आहे.बलात्काराच्या या घटनेमुळे परिसरात एकच खळबळ उडाली आहे. या घटनेबाबत भूमाता ब्रिगेडच्या अध्यक्ष तृप्ती देसाई यांनी प्रतिक्रिया दिली आहे. फार्महाऊसवर काम करणाऱ्या कामगाराने अल्पवयीन मुलीवर अत्याचार केला असून त्याला अटकही करण्यात आली आहे. मात्र, या प्रकरणात पीडितेला न्याय मिळवून देण्यासाठी दबाव येत आहे. उपमुख्यमंत्री देवेंद्र फडणवीस यांना विनंती आहे की हे प्रकरण तातडीने मार्गी लागवण्यासाठी फास्ट ट्रॅक कोर्टात या प्रकरणाचा निकाल लावावा, अशी मागणी तृप्ती देसाई यांनी केली आहे.